ازاى تقولى انك امى
وانك عشقانى وشايلة همى
وانت ليلك نهارك
تمرحى وتسبحى وسط دمى
ازاى تخلى اخويا عدوى بسلاحه
وفقلبى يغرس سكين
هان عليك ولادك المساكين
يوم صلاتهم يوم عيدهم يوم فرحهم يبقى حزين
ام تصرخ على ولدها مش لقياه ابنى فين ؟
وطفل لسة نبتة خضرة يصبح يتيم
وعروسة يوم فرحها تلبس اسود وتتحنى بطين
وانت بتزغرطى وتبلى شربات وتقولى
شهدا ليوم الدين
ما انت فى يوم كنت عشقى
وكنت بيكى مفتون
وكل فجر ليكى اغنى ويقولوا عليا مجنون
وانا اللى قدمتلك روحى مهرك
وقلت عشانك كله يهون
حاربت عشانك هكسوس ومجوس
وحطين وسبعة وستين
وحافظت على عرضك فى تلاتة وسبعين
كنت ليكى مينا ورمسيس وصلاح الدين
كنا ولادك قايمين نايمين
جرجس ومينا ومحمد وحسين
وغازلتك بقلمى وحميتك برمحى
كل ده ومش عارفة تسامحى
ليه تخلى اخويا يمحى خطايا
يدوس بقدمه عليا يشوه ملامحى
يرسم بطولاته من وجعى وجرحى
ليه عن دراعاتك بتبعدينى
فين وعدك انك جوه حضنك هتدفنينى
ليه عايزانى ابعد وارحل وليه عشانه تطردينى
واسيب لمين ولادى وارضى وناسى المدفونين
وذكرياتى معاك اهرب منها فين
فاكرة الهرم والنيل
والازهر ودير سانت كاترين
ولا قلعة صلاح الدين
مش هاسيبك حتى لوقتلتينى
حتى لو هنتينى فى شرفى ولا دينى
واللى ما شافش اكتر من اللى شاف
ان اللى يقتل ولدك عمره
عمره فى يوم ما عليكى هيخاف
